گٹی سکول دی پنجاہ سال پرانی کتھا ”پہلا حصہ“

ادھی صدی جے پچھے جاٸیے

تہانوں  اپنی   کتھا   سناٸیے

نہ  کوٸی  مکتب  نہ  مدرسہ

پڑھن دا شوق وی  لِسہ  لِسہ

فٸیر وی جے کوٸی پڑھنا چاہوٸے

سدھا     سانواں    گٹی    جاوے

بوڑھاں دی ٹھنڈی جٸ چھاں سی

پڑ ھن  پڑھون  دی  گٹی تھاں سی

چھوٹی عمر تے کچے رستے

٢٠ ٢٠ سیر دے بھارے بستے

بغل  چہ  پاکے  ڈنڈٸیے پینا

اک دوجے ناں پھسنا کھینا

تڑھی وی لاٶنی پیار وی کرنا

وڈیاں   دا   اعتبار   وی   کرنا

بھاویں  ہر  کوٸی  پاٹے خاں سی

پڑ ھن پڑھون دی گٹی تھاں سی

بھانویں گرمی بھانویں سردی

پہن   کے   آٶنی  کالی  وردی

دھپ ناں پنڈا بھانویں سڑنا
وردی   بِنا   سکول   نہ   وڑنا

پہنچے رکھنے اینے کُھلے 
ہرتھاں پَین ہوا دے بُلے

ٹیڈی  فیشن  سخت  منع  سی
پڑھن پڑھون دی گٹی تھا سی

سردی جھلی ، دُھپے سڑیا
گٹی علم دی پوڑی چڑھیا

اُستاداں دے صدقے جاواں
لاڈ   لڈاۓ   وانگر   مانواں

اُنگل پھڑ کے ٹرن سکھایا
علم  ادب  دی  راہے  پایا

گٹی   علم   ادب  دی  ماں  سی
پڑھن پڑھون دی گٹی تھاں سی


نظم اجے جاری اے